អត្តពលិកកីឡារាំ ៩រូប ត្រៀមចេញទៅប្រកួតលើកដំបូង ដើម្បីដណ្តើមជើងឯកអាស៊ីឆ្នាំ២០១៨ នៅហុងកុងស្អែកនេះ នាសាធារណរដ្ឋប្រជាមានិតចិន ដែលគ្រោងចេញដំណើរ នាវេលាម៉ោង ២រសៀលថ្ងៃទី១៣ ខែកញ្ញាស្អែកនេះ។ នេះបើតាមការឲ្យដឹងពីលោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា។
អគ្គលេខាធិការដដែលបន្ដថា ការប្រកួតជើងឯកអាស៊ីនេះ គ្រោងធ្វើឡើងរយៈពេល ៣ថ្ងៃ ចាប់ពីថ្ងៃទី១៣-១៦ ខែកញ្ញា ឆ្នាំ២០១៨ នៅទីក្រុងហុងកុង ហើយនេះគឺជាលើកទី១ ហើយ ដែលកម្ពុជាបានបញ្ជូនអត្តពលិករបស់ខ្លួន ទៅចូលរួមប្រកួតក្នុងព្រឹត្តិការណ៍កម្រិតអាស៊ីមួយនេះ ដែលមានឈ្មោះថា ADSF Asian Single Dance Sport Championship 2018។
លោកស្រីបន្ថែមថា បេសកកម្មនេះ អត្តពលិកកម្ពុជា នឹងត្រូវប្រកួតលើ ២វិញ្ញាសា គឺវិញ្ញាសាឯកឧត្តជន និងវិញ្ញាសាចម្រុះជាក្រុម។ រីឯសមាសភាពរបស់អត្តពលិកកម្ពុជារួមមានកីឡាករ ច័ន្ទ វ៊ិចទ័រ, ម៉ូវ ដាវីន, សេង សុខគីម និងកីឡាករ ភុន ស៊ីវុត្រា។ រីឯកីឡាការិនី គឺកញ្ញា ព្រាប ដានីឡា, សាន រូស្សា, យី អ៊ីលីង, ហ៊ាន លក្ម្សី និងកីឡាការិនី ម៉ូវ ដានីតា គ្រាដែលគូប្រជែងនៅមិនទាន់កំណត់ប្រទេសចូលរួមនោះទេ។
ទោះជាយ៉ាងណាខាងសហព័ន្ធកីឡារាំកម្ពុជាក៏មិនរំពឹងលើលទ្ធផលឈ្នះ ឬចាញ់ពេកទេ ព្រោះតែជាលើកដំបូងសម្រាប់វិស័យដ៏ក្មេងខ្ចីនេះរបស់កម្ពុជា សហព័ន្ធផ្ដោតលើការដកស្រង់បទពិសោធន៍ និងបច្ចេកទេសច្រើនជាង ដើម្បីជំរុញកីឡាករ-កីឡាការិនីវ័យក្មេងកម្ពុជា ឲ្យកាន់តែមានសមត្ថភាព សម្រាប់ត្រៀមចូលរួមក្នុងព្រឹត្តិការណ៍អន្ដរជាតិនានា ពិសេសគឺការត្រៀមចូលរួមប្រកួតកីឡាស៊ីហ្គេម លើកទី៣០ នៅហ្វីលីពីន នាឆ្នាំ២០១៩ ខាងមុខតែម្ដង៕
ប្រភពពី៖Freshnews
