ក្រុមហ៊ុនបណ្តាញទំនាក់ទំនងសង្គម Instagram បានសម្រេចតែងតាំងអ្នករចនាជើងចាស់របស់ Facebook គឺលោក អាដាម ម៉ូស្សឺរី (Adam Mosseri) ជានាយកប្រតិបត្តិ (CEO) ថ្មីរបស់ខ្លួន ក្រោយការប្រកាសលាលែងពីតំណែងគួរឲ្យភ្ញាក់ផ្អើលរបស់សហស្ថាបនិក Instagram។
សហស្ថាបិក Instagram គឺលោក ខេវិន ស៊ីស្តម (Kevin Systorm) និង លោក ម៉ៃក៍ គ្រីហ្គឺ (Mike Krieger) ដែលកាលពីសប្តាហ៍មុន បានប្រកាសលាលែងពីតំណែងជា នាយកប្រតិបត្តិ និងនាយកផ្នែកបច្ចេកវិទ្យា (CTO) នោះបានឲ្យដឹងថា លោក Adam Mosseri ដែលជាអ្នករចនាជើងចាស់របស់ Facebook និងជានាយករងផ្នែកផលិតផលរបស់ Instagram បានឡើងកាន់តំណែងជា CEO របស់បណ្តាញសង្គម ដែលល្បីឈ្មោះខាងចែករំលែករូបថតនេះ គិតចាប់ពីថ្ងៃទី០១ ខែតុលានេះតទៅ។
គួរបញ្ជាក់ផងដែរថា Instagram ស្ថិតក្រោមការគ្រប់គ្រងរបស់ Facebook។
នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអង្គារ ទី០២ ខែតុលា ឆ្នាំ២០១៨៕