អាចថាជារឿងដ៏រីករាយមួយ សម្រាប់ការវិលត្រលប់មកជួបបណ្ដា អ្នកគាំទ្ររបស់ តារាចម្រៀងស្រី អ្នកនាង យ៉ាន លីនដា ក្រោយពេលបាត់ដំណឹងរូបនាង ពីបណ្ដាញសង្គមនានាមួយរយៈពេលមកហើយ។
យ៉ាងណាមិញ ស្របពេលបាត់ដំណឹងសូន្យឈឹង ពីបណ្ដាញសង្គមនានាជាង១ឆ្នាំមកនេះ មហាជន និងអ្នកគាំទ្រតែងតែគិតថារូបនាង ប្រហែលជាមានជីវិតថ្មី ដែលល្អប្រសើរយ៉ាងមានក្ដីសុខ ជាមួយនឹងកូនស្រី នៅលើទឹកដីអូស្ត្រាលីទៅហើយ តែគ្រប់យ៉ាងបានផ្ទុយខុសពីការរំពឹងទុករបស់ទស្សនិកជនទៅវិញ។
តារាចម្រៀងនឹងសម្ដែង យ៉ាន លីនដា សរសេរសារយ៉ាងវែងអន្លាយផ្ញើជូនមហាជនទូទៅ ឲ្យមានការប្រុងប្រយ័ត្នខ្ពស់ចំពោះបញ្ហាជំងឺផ្លូវចិត្ត។ ក្នុងសារនោះដែរ តារាស្រីរូបនេះរៀបរាប់ថា កូនស្រីតែមួយគត់ដែលនាងស្រឡាញ់ស្មើជីវិត បានទទួលរងសម្ពាធផ្លូវចិត្តធ្ងន់ធ្ងរ រហូតចង់ចាកចេញពីនាងជារៀងរហូត។
ដោយសារតែមូលហេតុទាំងនេះហើយ បណ្ដាលឲ្យតារាស្រីរូបនេះ ត្រូវចាំបាច់កាត់ផ្ដាច់ទំនាក់ទំនងផ្សេងៗនៅលើបណ្ដាញសង្គម ដោយរូបនាងត្រូវយកពេលវេលាដែលសេសសល់ពីការងាររបស់ខ្លួនទាំងប៉ុន្មាន មកមើលថែទាំកូនស្រីយ៉ាងពេញទំហឹងបែបនេះ៕
