រញ្ជួយដីកម្រិត ៦.០រ៉ិចទ័រ វាយប្រហារជាថ្មីលើប្រទេសឥណ្ឌូនេស៊ី បណ្តាលអោយមនុស្ស៣នាក់បានស្លាប់

គ្រោះរញ្ជួយដីកម្រិត៦.០រ៉ិចទ័រ វាយប្រហារលើតំបន់ឆ្នេរ​នៃកោះបាលី និងកោះជ្វា​ នៅថ្ងៃព្រហស្បតិ៍នេះ មនុស្សយ៉ាងហោចណាស់០៣នាក់ បានស្លាប់ នេះបើ តាមការចេញផ្សាយដោយសារព័ត៌មាន Channel News Asia នៅថ្ងៃព្រហស្បតិ៍ ទី១១ ខែតុលា ឆ្នាំ២០១៨។

អ្នកនាំពាក្យអាជ្ញាធរគ្រប់គ្រងគ្រោះមហន្តរាយឥណ្ឌូណេស៉ី លោក Sutopo Purwo Nugroho បានបញ្ជាក់ទៀតថា ជនរងគ្រោះទាំង០៣នាក់ខាងលើគឺជាអ្នករស់នៅក្នុងស្រុក Sumenep នៃកោះជ្វាភាគខាងកើត ហើយពួកគេស្លាប់ ដោយសារតែអគារបាក់សង្កត់។ លោក Nugroho បានបន្ថែមដូច្នេះថា៖ «គ្រោះរញ្ជួយដីនៅព្រឹកថ្ងៃព្រហស្បតិ៍នេះបានកើតឡើង នៅចំពេលពួកគេកំពុងដេក ហើយវាកើតឡើងភ្លាមៗដែលមិនអាចឱ្យអ្នកស្រុកមួយចំនួនគេចខ្លួន ទាន់ពេលវេលានោះទេ»។

គួរបញ្ជាក់ថា គ្រោះរញ្ជួយដីកម្រិត៦.០រ៉ិចទ័រខាងលើ មិនបានបង្កជារលកយក្សស៊ូណាមិឡើយ៕