ពិតជាគួរអោយភ្ញាក់ផ្អើលខ្លាំងណាស់ ដែលការពីម្សិលមិញនេះ កំពូលតារាចម្រៀងលោក ខេមរៈ សិរីមន្ត បានផុសរូបភាពនិងសាររៀបរាប់ពីស្ថានភាពជំងឺរបស់កញ្ញា ខេមរៈ ស្រីពៅ ដែលជាប្អូនស្រីបង្កើតរបស់ខ្លួន អោយមហាជនបានជ្រាប។
ជាក់ស្ដែង យោងតាមគណនីហ្វេសប៊ុក របស់លោក ខេមរៈ សិរីមន្ត បង្ហោះនូវរូបថតមួយសន្លឹក របស់កញ្ញា ខេមរៈ ស្រីពៅ ព្រមទាំងសរសេររៀបរាប់ថា «ជាច្រើនឆ្នាំមកនេះ ប្អូនស្រីដ៏កំសត់ម្នាក់នេះមិនដែលចង់ឃើញ Fan ដែលគាំទ្រគាត់ពិបាកចិត្ត ព្រោះតែស្ថានភាពជំងឺរបស់គាត់ឡើយ គាត់ចង់ឃើញ Fan គាត់ រីករាយគ្រប់ពេលវេលា…តែក្នុងនាមខ្ញុំជាបងប្រុសរបស់គាត់ ចង់ប្រាប់បងប្អូនទាំងអស់គ្នាថា នៅពេលខាងមុខនេះគាត់ត្រូវឆ្លងកាត់ការវះកាត់ ដ៏គ្រោះថ្នាក់មួយ…ខ្ញុំជាបងប្រុសជូនពរប្អូនឲ្យឆ្លងផុតពេលវេលាដ៏លំបាកនេះ បើបងប្អូនស្រឡាញ់នឹងគាំទ្រគាត់ ជូនពរគាត់ឲ្យឆ្លងផុតគ្រោះនេះផង ដើម្បីគាត់មានសុខភាពល្អ មកបំពេញការងារសិល្បៈវិញណា»។
តារាចម្រៀង ខេមរៈ សិរីមន្ត បានបង្ហាញឲ្យដឹងទៀតថា តារាចម្រៀង ខេមរៈ ស្រីពៅ នឹងត្រូវទទួលការវះកាត់ ដ៏គ្រោះថ្នាក់ក្នុងពេលឆាប់ៗខាងមុខនេះ ប៉ុន្តែទោះជាយ៉ាងណាក្ដី លោក មិនបានបង្ហើបប្រាប់ឲ្យដឹងពីប្រភេទជំងឺ របស់ខេមរៈ ស្រីពៅ ដែលត្រូវជាប្អូនស្រី បង្កើតរបស់ខ្លួននោះទេ ពោលគឺលោកបានត្រឹមតែបង្ហើប ប្រាប់ពីស្ថានភាពជំងឺរបស់នាងតែប៉ុណ្ណោះ។
តាមរយៈសារខាងលើនេះ បានធ្វើអោយអ្នកគាំទ្រជាច្រើន ដែលស្រលាញ់និងចង់ស្ដាប់សម្លេងរបស់កញ្ញា ខេមរៈ ស្រីពៅ គ្រប់គ្នា បង្ហាញអោយព្រួយបារម្ភយ៉ាងខ្លាំង ព្រោះតែថ្មីៗនេះ ឃើញកញ្ញា បង្ហើបប្រាប់ថានឹងវិលចូលសិល្បៈវិញ ៕
