ពិតជាចម្លែងដែលផ្ទះមួយបាននៅឈរយ៉ាងមាំខណៈផ្ទះនៅជុំវិញខ្លួនបានដួលរលំរាបដល់ដី បុរសពីរនាក់ដែលជាម្ចាស់ផ្ទះតែមួយគត់មិនដួលរលំក្រោយព្យុះ Michael វាយប្រហារ បានទម្លាយមូលហេតុពីក្រោយរឿងរ៉ាវនេះ។
លោក Lebron Lackey និងពូរបស់ខ្លួន Russell King បានសាងសង់ផ្ទះនៅឡើងកាលពីឆ្នាំមុននៅទីក្រុង Mexico Beach យោងតាមម្ចាស់ផ្ទះទាំងពីរឲ្យដឹងថា ពួកគេបានសង់ផ្ទះនេះដោយហ្មត់ចត់ដើម្បីទប់ទល់នឹងខ្យល់ព្យុះល្បឿនរហូតដល់ជាង ៤០០គីឡូម៉ែត្រក្នុងមួយម៉ោង។ នៅពេលសាងសង់ ពួកគេបានចាក់គ្រឹះផ្ទះរហូតដល់ជាង ១២ម៉ែត្រទៅក្នុងដី ហើយសាងសង់ជញ្ជាំងបេតុងដ៏ក្រាស់ ជាមួយនឹងខ្សែកាបដើម្បីចងដំបូលផ្ទះកុំឲ្យប៉ើងទៀតផង។ ម្ចាស់ផ្ទះបន្ថែមទៀតថា “យើងដឹងច្បាស់ណាស់ថាខ្យល់ព្យុះនឹងវាយប្រហារជាញឹកញាប់នៅតំបន់នេះ ដូច្នេះយើងសង់ផ្ទះនេះឡើងដើម្បីទប់ទល់ជាមួយវា។ទោះយ៉ាងណាក៏ដោយ ខណៈពេលខ្យល់ព្យុះកំពុងវាយប្រហារ លោក Lackey បានសម្រេចចិត្តភៀសខ្លួនទៅកាន់រដ្ឋ Tennessee ដើម្បីសុវត្ថិភាព។
ដែលព្យុះកម្រិត ៤វាយប្រហារកាលពីសប្ដាហ៍មុនជាមួយល្បឿនខ្យល់ជិត ២៥០គីឡូម៉ែត្រក្នុងមួយម៉ោង។ អ្វីដែលគួរឲ្យកត់សម្គាល់តាមរយៈរូបថតពីលើអាកាស គេឃើញផ្ទះផ្សេងៗនៅជុំវិញនោះសុទ្ធតែដួលរាបដល់ដី ចម្លែកតែផ្ទះរបស់ពូ និងក្មួយនេះវិញបែរជានៅឈរជើងដដែល។
ក្រោយពេលខ្យល់ព្យុះបានបញ្ចប់ លោកមានការភ្ញាក់ផ្អើលជាខ្លាំងក្រោយពេលដែលផ្ទះរបស់លោកនៅតែអាចឈរជើងបាន៕
