Home ពត៍មានថ្មីៗ សម្តេចតេជោ ហ៊ុន សែន សន្យានឹងបន្តបំណងប្រាថ្នារបស់វេជ្ជបណ្ឌិត Beat Richner ក្នុងការជួយកុមារកម្ពុជា

សម្តេចតេជោ ហ៊ុន សែន សន្យានឹងបន្តបំណងប្រាថ្នារបស់វេជ្ជបណ្ឌិត Beat Richner ក្នុងការជួយកុមារកម្ពុជា

456

ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានសន្យានឹងបន្តបំណងប្រាថ្នារបស់វេជ្ជបណ្ឌិត Beat Richner ក្នុងការជួយកុមារកម្ពុជា នៅក្នុងបណ្តាឆ្នាំខាងមុខទៀត បើទោះបីលោកវេជ្ជបណ្ឌិត បានទទួលមរណភាពក៏ដោយក្តី។ នេះបើតាមលិខិតរបស់សម្តេចតេជោ ហ៊ុន សែន ផ្ញើជូនលោក Alain Berset ប្រធានាធិបតីសហព័ន្ធស្វីស ចំពោះមរណភាពរបស់ លោកវេជ្ជបណ្ឌិត Beat Richner។

សម្តេចតេជោនាយករដ្ឋមន្ត្រីនៃកម្ពុជា បានបញ្ជាក់យ៉ាងដូច្នេះថា «ក្នុងឱកាសដ៏ក្រៀមក្រំនេះ តាងនាមឲ្យរាជរដ្ឋាភិបាល និងប្រជាជនកម្ពុជា ខ្ញុំសូមសម្តែងនូវសមានទុក្ខយ៉ាងស្មោះស្ម័គ្របំផុត តាមរយៈឯកឧត្តម ជូនគ្រួសារសពដែលបានបាត់បង់ សមាជិកជាទីស្រលាញ់របស់ខ្លួន។ ស្មារតី និងសមិទ្ធិផលដ៏ថ្លៃថ្លារបស់សពលោកវេជ្ជបណ្ឌិតនឹងស្ថិតក្នុងបេះដូងយើងខ្ញុំ។ យើខ្ញុំងនឹងបន្តបំណងប្រាថ្នារបស់គាត់ ក្នុងការជួយកុមារកម្ពុជា នៅក្នុងបណ្តាឆ្នាំខាងមុខទៀត។ យើងខ្ញុំសូមបួងសួងឲ្យព្រលឹង របស់លោកវេជ្ជបណ្ឌិតបានទៅកាន់សុគិតភព»។​

សម្តេចតេជោ ហ៊ុន សែន បានបញ្ជាក់ទៀតថា «ខ្ញុំបានទទួលដំណឹងដ៏ក្រៀមក្រំបំផុត អំពីអនិច្ចកម្មនៅថ្ងៃទី០៩ ខែកញ្ញា ឆ្នាំ២០១៨ របស់លោកវេជ្ជបណ្ឌិត Beat Richner ស្ថាបនិកមន្ទីពេទ្យគន្ធបុប្ជា នៅប្រទេសកម្ពុជា។ មរណភាពរបស់លោកវេជ្ជបណ្ឌិត គឺជាការបាត់បង់ជនដ៏មហិមារមួយរូប ដែលប្តូរផ្តាច់មិនគិតពីខ្លួនឯង ក្នុងការជួយសង្គ្រោះកុមារនិងស្ត្រីកម្ពុជារាប់លាននាក់ ចាប់តាំងពីឆ្នាំ១៩៩២»។

ជាមួយគ្នានេះ សម្តេចតេជោ ហ៊ុន សែន បានប្រាប់ប្រធានាធិបតិស្វិសទៀតថា លោកវេជ្ជបណ្ឌិត ក៏ជាបុគ្កលមួយរូប ដែលសម្តេច រួមទាំងប្រជាជនកម្ពុជាតែងតែចងចាំថា បានរួមចំណែកដ៏ធំធេងក្នុងការធ្វើឲ្យប្រសើរឡើង នូវប្រព័ន្ធសុខាភិបាលសាធារណៈរបស់ប្រទេសកម្ពុជា៕

ប្រភពពី៖Freshnews